د بلجیم د پلازمینې لوی هوایي ډګر وروسته له هغې وتړل شو چې د مسافرینو په خروجي سالون کې یې د دوچاودنو خبر ورکړل شو.
د بروکسل د ترانسپورټي خدماتو چارواکو هم وروسته له هغې چې د اروپایي ټولنې دفترونو ته نږدې د میلبیک میترو په تم ځای کې چاودنه وشوه، په ښار کې ټول عامه ترانسپورټ بند کړی دی.
د چاودنو علت معلوم نه دی.
پولیسو وویل، د بروکسل په زاوینیتم هوایي ډګر کې په چاودنو کې یوکس وژل شوی، خو د فدرالي څارنواله په حواله ویل شوي چې وایي ۱۳ کسان وژل شوي او ۳۵ نور ژوبل شوي دي.
د بیلګه خبري اژانس وویل له چادونو مخکې ډزې او په عربې ژبې شعارونه اورېدل شوي دي.
د میلبییک د میترو په تم ځای کې هم د تلفاتو راپورونه ورکول شوي دي.
د بلجیم د کړکېچونو مرکز اوسېدونکو ته سپارښتنه کړې چې په خپلو ځایونو کې پاتې شي.
بلجیم د تروریزم د خطر اندازه لوړې اندازې ته پورته کړی او اروپایي کمېسیون وویل چې د اروپایي اتحادیې پرسونل ته ویل شوي په دفترونو یا هم په کورونو کې دننه پاتې شي.
د اروپا په نورو هوایي ډګرونو کې هم امنیتي تدابیر پیاوړي شوي دي.
دغه پېښې څو ورځې وروسته له هغې پېښیږي چې په بروکسل کې د پاریس د نومبر د خونړیو حملو اصلي مشکوک صالح عبدالسلام ونیول شو.
په دغو حملو کې ۱۳۰ کسان وژل شوي و.