له یمن څخه راپورونه وایي، د دغه هېواد په شمال کې د سعودي په مشرۍ ایتلاف د هوایي بمبارۍ په نتیجه کې لږ تر لږه ۴۱ تنه ملکي وګړي وژل شوي او لسګونه نور ټپیان دي.
عیني شاهدان وایي، لږترلږه دوه بمونه پرون په حجه ښار کې د ګڼې ګوڼي په یوه ډک مارکېټ ولګېدل.
دغه ښار تر ډېره د شیعه حوثي یاغیانو په لاس کي دی.
د سعودي په مشرۍ ایتلاف وایي، دوی دغه راپورونه ارزوي.
د ملګرو ملتونو د راپور له مخې له هغه راهیسې چې د سعودي په مشرۍ ایتلاف د ۲۰۱۵ میلادي کال د مارچ له وروستیو څخه د یاغیانو په وړاندې پوځي کمپاین پیل کړی، تر ۶۲۰۰ ډېر کسان وژل شوي چې نیمایې یې ملکي وګړي و.