د افغانستان فوټبال ملي لوبډلې د لوبو نېټه مشخصه شوه، د اسیا فوټبال کنفډراسیون د رسمي اعلان له مخې د اسیا د ۲۰۲۳ ملتونو جام ته د لارموندنې وروستي پړاو سیالۍ د ۲۰۲۲میلادي کال په جون میاشت کې کېږي.
د یاد فدراسیون په وینا، دا سیالۍ به د کرونايي محدودیتونو له کبله په لنډ وخت کې د جون له ۸مې تر ۱۴مې پورې ترسره او د افغانستان فوټبال ملي لوبډله به د شپږو لوبو پر ځای درې لوبې له خپلو سیالانو سره وکړي.
د افغانستان فوټبال ملي لوبډلې سیالان تر دې دمه مشخص شوي نه دي، خو د افغان لوبډلې د سیالانو له منځه به یو هېواد د کوربه په توګه انتخاب شي.
که د افغانستان د فوټبال ملي لوبډله د خپل ګروپ په دوو لومړنیو لوبډلو کې راشي، د اسیا ۲۰۲۳میلادي کال د ملتونو جام ته به لاره پيدا کړي.