د لاسرسۍ وړ لېنکونه

تازه خبر
یکشنبه ۴ غبرګولی ۱۴۰۴ کابل ۰۸:۴۰

نړۍ

واشنګټن: مسکو دې نیول شوي مظاهره کوونکي او خبریالان خوشې کړي

روسیه کې مظاهرې او د پولیسو اخ‌وډب
روسیه کې مظاهرې او د پولیسو اخ‌وډب

واشنګټن له مسکوه وغوښتل چې نیول شوي مظاهره کوونکي او خبریالان خوشې کړي.

روسیه کې د پرونیو مظاهرو پر مهال چې د کرملېن د مخالف الکسي ناوالني د خوشې کېدو په هدف ترسره شوې، څه باندې دوه زره کسان ونیول شول.

واشنګټن له مظاهره‌چیانو سره د دوی په وینا د پولیسو تاوتریخجن چلند غندلی دی.

د امریکا د بهرنیو چارو وزارت ویلي، نیول شوي هغه کسان دي چې د مظاهرو لپاره‌یې له خپلو بنسټیزو حقونو نه استفاده کوله.

اروپایي ټولنې هم په روسیه کې د مظاهره کوونکو نیول غندلي دي.

د دغې ټولنې د بهرني سیاست مشر جوزف بورېل ویلي، په روسیه کې د مظاهره کوونکو پر پراخې نیونې او له هغوی سره په شوي زورزیاتي خواشینی دی.

د ورځې تازه خبرونه دلته ولولئ

د غزې روغتیا وزارت: په یوه ورځ کې ۳۷ کسان وژل شوي دي

عکس ارشیف
عکس ارشیف

په غزه کې د روغتیا وزارت د یکشنبې په ورځ (د مې په ۲۵مه) اعلان وکړ چې په یوه ورځ کې په سیمه کې د اسراییلو په بریدونو کې لږ تر لږه ۳۸ کسان وژل شوي دي.

امریکا او اروپايي ټولنه حماس د یوې ترهګرې ډلې په توګه پیژني.

یاد وزارت ویلي چې په تیرو ۲۴ ساعتونو کې ۲۰۴ نور کسان ټپیان شوي دي.

د اسراییلو پوځ تر اوسه په دې اړه څه نه دي ویلي.

د غزې د روغتیا وزارت په وینا، پدې شمېر کې هغه قربانیان شامل ندي چې د سیمې په شمال کې په روغتونونو کې ثبت شوي دي ځکه اوس مهال هلته لاسرسی خورا ستونزمن دی.

د جرمني خبري اژانس ډي پي اې د راپور له مخې، له تېرې اونۍ راهیسې چې اسراییلو نوي بریدونه پیل کړي، په غزه کې هره ورځ د لسګونو کسانو د وژل کېدو راپور ورکړل شوی دی.

د فرانسې په دیجون ښار کې یو کس په ډزو ووژل شو

عکس له ارشیفه
عکس له ارشیفه

د ډیجون ښار د څارنوالۍ دفتر ویلي چې تیره شپه په ښار کې یو ۲۹ کلن سړی په ډزو ووژل شو.

دا پېښه د شينوو په جنوبي ولسوالۍ کې رامنځته شوه، چې د مخدره توکو د قاچاق لپاره مشهوره ده.

د څارنوال اولیور کاراکوش په وینا، "د وژنې په ځای کې د اتوماتیکو وسلو شاوخوا دوولس تشې مرمۍ موندل شوي".

ځینې مرمۍ په نژدې موټرونو او د دریم پوړ اپارتمان کې ولګېدې، خو بل څوک ټپي نه شو.

د جنايي پولیسو د څېړنو له مخې، بریدګر د شپې په نیمایي کې د خلکو هغې ډلې ته نژدې شو چې قرباني ورسره روان و، پر هغوی یې ډزې وکړې او بیا په موټر کې وتښتېد.

قرباني د دیجون اوسیدونکی و او د مخدره توکو اړوند هیڅ جرمي ریکارډ یې نه درلود.

له دې پيښې اړوند د "منظم قتل او په جرمي فعالیتونو کې د ګډون" په اړه تحقیقات پیل شوي دي.

ایر انډیا په انګلستان کې د الوتنو د ځنډ له امله تر ټولو بد هوايي شرکت بلل شوی دی

اېر انډیا په انګلستان کې د الوتنو د ځنډ له امله تر ټولو بد هوايي شرکت بلل شوی دی.

د انګلستان د ملکي هوايي چلن ادارې د معلوماتو له مخې، د دې شرکت الوتنې په ۲۰۲۴ کال کې په اوسط ډول ۴۵ دقیقې او ۴۸ ثانیې په ځنډ شوې وې.

تر ټولو اوږد ځنډ د ګیټوک څخه بنګلور ته پر لاره کې و، چې په اوسط ډول د ۵۰ الوتنو لپاره یو ساعت او ۲۳ دقیقې ځنډ راپور شوی و.

اېر انډیا ویلي: د ځنډ لامل "هغه عوامل دي چې د دوی له کنټروله دباندي دي".

په دې سروې کې د انګلستان له هوايي ډګرونو څخه د هغو هوايي شرکتونو الوتنې شاملې وې چې تیر کال یې تر ۲۵۰۰ زیاتې الوتنې ترسره کړې وې.

ټاټا ګروپ، اېر انډیا شرکت، د ۲۰۲۲ کال په جنوري کې د هند له حکومته واخیست.


ایراني فلم جوړونکي د کن د ۷۸م نړیوال فلم فستیوال د سرو زرو نخل جایزه وګټله

د کن ۷۸م فلم فستیوال - د پای مراسم
د کن ۷۸م فلم فستیوال - د پای مراسم

د ایران د معترض فلم جوړونکي جعفر پناهي لخوا جوړ شوی فلم "یوه ساده حادثه د کن د ۷۸م نړیوال فلم فستیوال د سرو زرو نخل جایزه وګټله؛ دا یوه معتبره جایزه ده، هغه فلم جوړونکي ته چې له تېرو ۱۵ کلونو راهیسې له ایران څخه د وتلو اجازه نه درلوده.

د شنبې په ورځ، مشهورې اداکارې کیټ بلانشټ پناهي ته جایزه ورکړه، او د هغه د نوم له اعلان وروسته لیدونکو د ولاړو ستاینو سره د هغه هرکلی وکړ.

"یوه ساده حادثه" فلم د وحید په نوم د یو سړي کیسه بیانوي (د وحید مبصري لخوا لوبول شوی) چې یو سړی چې مصنوعي پښه لري تښتوي، په دې باور چې دا هماغه کس دی چې هغه یې په زندان کې شکنجه کړی او ژوند یې ویجاړ کړی دی. هغه بیا هڅه کوي چې د نورو ژوندي پاتې شویو کسانو سره تایید کړي چې دا هماغه پخوانی شکنجه کوونکی دی او پریکړه کوي چې د هغه سره څه وکړي.

د سې شنبې په ماښام، د غویي په ۳۰مه، ښاغلی پناهي له دوو لسیزو څخه راپدیخوا د لومړي ځل لپاره د کن فلم فستیوال په سره فرش کې راڅرګند شو.


ترکیې ولسمشر استانبول کې د سوریې له ولسمشر احمد الشرع سره د کتنې په ترڅ کې د سوریې پر وړاندې د بندیزونو د لرې کولو هر کلی کړی

د ترکیې ولسمشر رجب طیب اردوغان (ښي) او د سوریې لنډمهاله ولسمشر احمد الشرع د ۲۰۲۵ کال د فبروري په ۴مه د انقرې په ولسمشرۍ ماڼۍ کې د خپلې غونډې وروسته د ګډ مطبوعاتي کنفرانس په ترڅ کې لاسونه ورکوي. ( عکس ارشیف)
د ترکیې ولسمشر رجب طیب اردوغان (ښي) او د سوریې لنډمهاله ولسمشر احمد الشرع د ۲۰۲۵ کال د فبروري په ۴مه د انقرې په ولسمشرۍ ماڼۍ کې د خپلې غونډې وروسته د ګډ مطبوعاتي کنفرانس په ترڅ کې لاسونه ورکوي. ( عکس ارشیف)

د ترکیې ولسمشرۍ ماڼۍ اعلان وکړ چې رجب طیب اردوغان د شنبې په ورځ په استانبول کې د سوریې له ولسمشر احمد الشرع سره د کتنې په ترڅ کې د سوریې پر وړاندې د بندیزونو د لرې کولو په اړه د متحده ایالاتو او اروپايي ټولنې د پریکړې هرکلی وکړ.

دا غونډه یوه ورځ وروسته له هغه وشوه چې د ټرمپ ادارې پر سوریې د بندیزونو د یویې برخې د لرې کولو امر وکړ. اروپايي ټولنې هم تېره اونۍ موافقه وکړه چې په تدریجي ډول به د دمشق پر وړاندې بندیزونه لرې کړي.

په دې غونډه کې د ترکیې او سوریې د بهرنیو چارو او دفاع وزیرانو او همدارنګه د دواړو هېوادونو د استخباراتي ادارو مشرانو ګډون کړی و. د ترکیې او سوریې رسنیو راپور ورکړی چې خبرې اترې په عمده توګه په سوریه کې د بیارغونې پروسې او د امنیتي همکارۍ راتلونکي باندې متمرکزې وې.

بریتانیا کې د یوه کال په ترڅ کې پاکستانیانو تر افغانانو د مهاجرت لپاره ډیر درخواستونه ورکړې دي

( دعکس له ارشیف څخه)
( دعکس له ارشیف څخه)

د بریتانیا د کورنیو چارو د وزارت د راپور له مخې د روان کال د مارچ تر میاشتې پورې په یوه کال کې یولس زره اته څلویښت پاکستانیانو په بریتانیا کې د پناه غوښتنه کړې ده.

د بریتانیا د کورنیو چارو وزارت د دې راپور له مخې چې پرون له رسنیو سره شریک شو، تر پاکستانیانو وروسته د افغانانو شمیر زیات دی چې په دغه هیواد کې یې د یوه کال په ترڅ کې د مهاجرت غوښتنلیکونه سپارلې دي، د دغو افغانانو شمیر د راپور له مخې اته زره نهه شپیتو ته رسیږي.

په مجموع کې په تیر یوه کال څه باندې یولک او نهه زره کسانو په بریتانیا کې د پناهندګي درخواستونه ورکړې دي.

سوریې د امریکا د حکومت د هغې پرېکړې هرکلی کړی چې پر دې هېواد ځینې بندیزونه یې لیرې کړل

د امریکا ولسمشر ډونالډټرمپ د مې په ۱۴ مه د سوریې له ولسمشر احمدالشرع سره وکتل
د امریکا ولسمشر ډونالډټرمپ د مې په ۱۴ مه د سوریې له ولسمشر احمدالشرع سره وکتل

د سوریې حکومت د امریکا د یوې برخې بندیزونو د لیرې کېدو او په دې هېواد کې د پانګونو د جواز د صادرېدو هرکلی کړی دی.

د امریکا د خزانې وزارت پرون د یوه جواز په صادرولو سره اعلان وکړ چې د احمدالشرع په مشرۍ د سوریې له موقت حکومت، مرکزي بانک، هوايي شرکت، دولتي شرکتونو او نورو مهمو بنسټونو سره مالي مبادلات جواز لري.

د سوریې د بهرنیوچارو وزارت نن (د غبرګولي ۳مه) په یو بیان کې دا اقدام د دې هېواد د بشري او اقتصادي ستونزو د کمولو په برخه کې مثبت ګام وباله.

د امریکا حکومت اعلان کړی چې دا اقدام یې له څو کاله کورنۍ جګړې وروسته د سوریې د بیارغونې له بهیر سره د مرستې په هدف کړی دی. سپینې ماڼۍ په عین حال کې له دمشق څخه غوښتي دي چې له سوریې څخه د بهرنیو جنګیالیو د ایستلو په ګډون یولړ مشخص اقدامات وکړي.

د امریکا د بهرنیوچارو وزارت هم د شپږو میاشتو په مخه پر سوریې د بندیزونو معافیت اعلان کړ. د بهرنیوچارو وزیر مارکو روبیو وايي، دا معافیت به سوریې ته د بریښنا، انرژۍ او نورو خدماتو د برابرولو فرصت په لاس ورکړي.

امریکا له ۲۰۱۱ کال راهیسې پر بشاراسد او د هغه پر نژدې خپلوانو بندیزونه لګولي وو، خو په تیره ډسمبر میاشت کې د احمدالشرع په مشرۍ د وسله والو په لاس د اسد د واکمنۍ له پرځېدو وروسته هرڅه بدل شول.

پر سوریې د بندیزونو د لیرې کولو غوښتنه د سعودي ولیعهد محمدبن سلمان د امریکا له ولسمشر ډونالډټرمپ څخه کړې وه.

په واشنګټن ډي سي کې د دوو اسراییلیانو له وژل کېدو وروسته کلک امنیتي تدابیر نیول شوي دي

د امریکا پلازمېنه واشنګټن ډي سي (آرشیف)
د امریکا پلازمېنه واشنګټن ډي سي (آرشیف)

د امریکا په پلازمېنه واشنګټن ډي سي کې د اسراییل د سفارت د دوو کارکوونکو له وژل کېدو وروسته په دې ښار کې د ښوونځیو او دیني مرکزونو لپاره کلک امنیتي تدابیر نیول شوي دي.

د واشنګټن ډي سي د ښاري پولیسو مشرې پامېلا سمیت پرون خبریالانو ته وویل، د پلازمېنې په شاوخوا کې د استوګنې په سیمو او مذهبي مرکزونو ته نژدې د قانون د تنفیذ د ځواکونو حضور پیاوړی شوی دی.

مېرمن سمیت زیاته کړه چې په ښوونځیو او د واشنګټن ډي سي په څېر ځایونو کې د یهودانو د ټولنو د مرکز لپاره هم اضافي تدابیر نیول شوي.

د ثور په ۳۱مه نېټه په واشنګټن ډي سي کې د اسراییل د سفارت دوه کارکوونکي د یهودیانو موزیم ته نژدې په ډزو ووژل شول. پولیسو د ډزو په تړاو د یو شکمن کس د نیولو خبر ورکړی. پولیس وايي دې کس د نیول کېدو پرمهال د فلسطین آزاد کړئ شعار ورکاوه.

د روسیې بې پیلوټه الوتکو او توغندیو یوځل بیا د اوکراین پلازمېنه کییف په نښه کړ

پر پلازمېنه کییف د روسیې تازه حملې
پر پلازمېنه کییف د روسیې تازه حملې

روسیې نن سهار یوځل بیا د اوکراین پر پلازمېنه کییف د توغندیو او بې پیلوټه الوتکو په وسیله برید وکړ.

د اوکراین ولسمشر ولودیمیر زیلینسکي پر ټولنیزو شبکو د یوه بیان په خپرولو سره ویلي دي چې تېره شپه بیا ډېره سخته وه.

د کییف ښاروال ویتالي کلیچکو پر خپله ټلګرام پاڼه په ښار کې د چاودنو خبر ورکړ او ویې لیکل چې د هوايي مدافعې ځواک دفاعي اقدامات وکړل.

د کییف د پوځي ادارې مشر تیمور تکاچینکو او پولیسو د ښار په ۶ ناحیو کې د زیانونو خبر ورکړی او وايي، ۱۵ کسان ټپیان شوي دي.

پرون سهار د اوکراین پر اودیسې ښار د روسیې د توغندويي برید په نتیجه کې دوه کسان مړه او څو نور کسان ټپیان شول.

د روسیې پوځ هم ویلي دي چې اوکراین د تېرې سه شنبې په ورځ د ۷۸۸ بې پیلوټه الوتکو په وسیله د روسیې پر خاوره برید وکړ. د پوځ په بیان کې راغلي دي چې د دې ډرونونو له ډلې ۷۷۶ یې شنډ شوي دي.

د امریکا حکومت په هارورډ پوهنتون کې د بهرنیو محصلانو داخله منع کړه

د امریکا د کورني امنیت وزارت د پنجشنبې په ورځ، (د مې په ۲۲مه) اعلان وکړ چې د دغه هېواد د ولسمشر دونالد ټرمپ ادارې په هارورډ پوهنتون کې د بهرنیو محصلانو د نوم ثبتولو اجازه‌لیک رسماً لغوه کړی دی.

د امریکا د حکومت له خوا په خپره شوې خبرپاڼه کې ویل شوي چې هارورډ پوهنتون، چې د دغه هېواد تر ټولو پخوانی پوهنتون ګڼل کېږي، نور اجازه نه لري بهرني محصلان ومني، او اوسني نړیوال محصلان باید یا نورو پوهنتونونو ته انتقال شي یا له امریکا ووځي.

د امریکا د کورني امنیت وزارت هارورډ پوهنتون تورن کړی چې «امریکا ضد بلواګرو او د تروریزم ملاتړو ته یې اجازه ورکړې چې په پوهنتون کې دننه پر یهودانو حملې وکړي.»

دغه وزارت همداراز هارورډ پوهنتون د چین له کمونیست ګوند سره په همغږۍ تورن کړی دی.»

هارورډ پوهنتون دا اقدام «غیرقانوني» بللی او ویلي یې دي چې د خپلو نړیوالو محصلانو لپاره مشورې، ملاتړ او د خدمتونو چمتو کولو ته ژمن دی.

دغه پوهنتون همداراز ټینګار کړی چې د نړیوالو محصلانو او څېړونکو د کوربه‌توب په تړاو پر خپل پروګرام ولاړ دی.

نور راوښيه

XS
SM
MD
LG