د فاریاب خلکو د انتخاباتو محلونه په خپل وخت پرانېستي دي. د ازادي راډیو خبریال اکرام الدین کرم په دې اړه راپور چمتو کړی.
د افغانستان دفاع وزارت وايي چې په ټول هېواد کې یې د ټاکنو د امنیت د ښه ترسراوي لپاره لازم تدابیر نیولي او په هغو سیمو کې چې وسله وال مخالفین د ټاکنو مخنیوی پکې کوي، هوايي عملیات ترسره کوي.
د دغه وزارت ویاند غفور احمد جاوید وايي چې د ننګرهار په لعلپورې ولسوالۍ کې یې پنځلس مخالفین چې د ټاکنو د بهیر مخنینوی یې کاوه، وژلي دي.
له نوموړي سره د ازادي راډيو خبریال محبوب شاه محبوب مرکه کړې چې د لاندې لېنک په کېکاږلو سره یې اورېدای شئ:
د پکتیکا والي الیاس وحدت وايي چې په دغه ولایت کې د توقع خلاف خلک د رأیې اچونې لپاره راوتلي او تر اوسه پورې هېڅ داسې کوم د رأیې ورکونې مرکز نشته چې د امنیت له امله تړل شوی وي.
له نوموړي سره د ازادي راډيو خبریال محبوب شاه محبوب مرکه کړې چې د لاندې لېنک په کېکاږلو یې اورېدای شئ:
نن د شنبې په ورځ د افغانستان د نورو ۳۲ ولایتونو په شان د خوست اوسیدونکي هم د ټاکنو د وخت له پیلدو مخکې د رأی اچونو مرکزونو ته ورغلل، تر څو خپلې رأیې د خوښې وړ نوماندانو ته وکاروي.
که څه هم په مرکز او یو شمېر ولسوالیو کې د رأی اچونې ډېری مرکزونه په خپل وخت پرانېستل شول، خو د بایو مټریک کولو ورو بهیر او د رأی ورکوونکو په لېستونو کې په ځنډ د نومونو پیدا کول هغه ستونزې دي چې خلک اړ دي، تر څو د رأی استعمال ته یو څه وخت منتظر پاتې شي.
دوی غوښتنه کوي چې د رأی اچونې وخت دې د مازدیګر له خوا دوه ساعته نور هم وغځول شي.
خوست والي پوهندوې حکم خان حبیبي چې د خوست ښار په مرکزي جامع جومات د رأی اچونې مرکز کې خپله رایه وکاروله ازادي راډیو ته وویل چې په یاد ولایت کې په ټاکلي وخت د رأی اچونې بهیر پیل شوی او خلک خپلې رأی کاروي.
دی زیاتوي، ولایتي ادارې د رای اچونې ټول محلونه پرانېستي خو دوی په ځینو سیمو کې امنیتي تهدیدونه نه ردوي.
خوست والي په یاد ولایت کې امنیت نسبتاً ښه وباله او پر خلکو یې غږ وکړ چې په پراخه کچه راووځي او په ټاکنو کې برخه واخلي.
خوست والي
د خوست په رأی اچونو مرکزونو کې ځینې تخنیکې ستونزې موجودې دي چې رای اچونکي ورڅخه شکایت لري.
دوی وايي، د ټاکنو د کمېسیون کارکوونکي د بایومټریک له ماشینونو سره ښه نه دي بلد او د یو کس په بایو مټریک ډېر وخت تیریږي.
د تریزیو ولسوالۍ یو تن اوسیدونکي مختارالدین جلالزي د ټیلیفون په لیکه وویل چې هلته زرګونو کسانو نوم لیکنه کړې، خو کمېسیون ورته یوازې د رأی اچونې یو مرکز پرانېستی دی.
د مرکزونو ناوخته پرانېستل او د بایومټریک د ماشینونو سم او چټک کار نه کول هغه ستونزې دي چې د اسماعیل خېلو او مندوزیو، تڼیو، شمل او په خپله په مرکز کې یو شمېر رأی ورکوونکو راسره شریکې کړې.
قومي مشر حاجي غنچه ګل وايي چې له یوې خوا د رأی اچونې مرکزونه په ځنډ پرانېستل شول او بل لوري ته د تخنیکي ستونزو له کبله خلک نه شي کولی، ژر-ژر رأی استعمال کړي.
ده غوښتنه وکړه چې د رأی اچونې وخت دې له ۴ بجو وروسته دوه ساعته نوره هم وغځېږي.
د مرکز اوسیدونکی شفیق الله وايي چې دا خلک د شته ستونزو سره-سره د دې لپاره راټول شوي چې داسو خلکو ته رأی ورکړي چې هېواد او ولس ته ژمنتیا ولري.
دیني عالم مولوي محمدعارف عرفان هم له خلکو وغوښتل چې خپلې رأی وکاروي، ځکه د دې هېواد د جوړولو یوازینۍ لاره رڼې ټاکنې دي.
ده زیاته کړه، خلک باید هغو نوماندانو ته رایه ورکړي چې ولس، خاورې او د هېواد نورو سپیڅلتیاوو ته ژمنتیا ولري.
خوست امنیه قوماندان مل پاسوال اخترمحمد نورزوی وايي چې د ټاکنو د بهیر لپاره د یاد ولایت ټولو امنیتي او پوځي ادارو په ګډه امنیتي تدابیر نیولي او تر اوسه په مرکز او ولسوالیو کې داسې پيښه نه لري چې د رأی اچونې د مرکزونو د تړل کیدو لامل شي.
خوست امنیه قوماندان په یو شمېر سیمو کې امنیتي ګواښونه او ستونزې مني، خو وايي چې امنیتي ادارې د امکان تر بریده د پيښو سیمو ته ځانونه رسوي.
راپور: نجیب الله الوخېل