د خوست چارواکي وايي چې نن په یاد ولایت کې د رای اچونې ټول ۱۸۶ مرکزونه
د رای اچونکو پر مخ خلاص دي.
دوی وايي، ځینې ستونزې شته، خو د امنیتي ګواښونو له کبله هېڅ د رای اچونې
مرکز نه دی تړلی.
په خوست ښار کې د رای اچونو مرکزونو ته زرګونه خلک وروان دي، د رای اچونې
په مرکزونو کې له دې کبله د خلکو ګڼه ګوڼه ډېره شوې چې د تخنیکي ستونزو له
کبله رایې ژر-ژر نه شي استعمالولی.
د خوست ښار د یعقوبیو اډې جومات ته سهار وختي د سلګونو کسانو اوږد کتار
جوړی شوی وو.
د ټاکنو د کمېسیون او د څار د یو شمېر ادارو سربیره په خپله نوماندانو په
مرکز او ټولو ولسوالیو کې زرګونه کسان ناظرین ګمارلي، تر څو د درغلیو مخه
ونیول شي.
رای اچونکي وايي، د ټاکنو کمېسیون لخوا ګمارل شوي کسان بایوميټریک سره ښه
نه دي بلد، ځینې مرکزونه ناوخته پرانیستل شول، خلک غوښتنه کوي چې د
ټاکنو بهیر له ټاکلي وخت دوه ساعته زیات نور هم وغځېږي.
د ننګرهار د ټاکنیز بهير ناضرين وايي، که موجوده تخنيکي ستونزې حل نشي زیات شمېر خلک به له رای اچونې محروم پاتې شي.
په ننګرهار کې د پارلماني ټاکنو ګډونوال د ټاکنو لپاره د نیول شویو امنيتي تدابیرو خوښ دي، خو په ټاکنیز بهير کې ځينې جدي تخنيکي ستونزې یادوي چې په خبره يې که په وخت ورته رسېدنه ونشي نو د په زیات شمېر کسان به له ټاکنو بې برخې پاتې شي.
د ننګرهار په اکثرو حوزو کې کسان له سټېکرو سره ولاړ دي، خو د رایه اچوونکو لېستونه یا بل محل سره تغیر شوي او یا هم نه دي رسېدلي.
د همدې ستونزې له امله زیات شمېر خلک د رای اچونې پرته خپلو کورو ته ستانه شول.
ناضرین وايي لومړی د دې ستونزې مخه باید ونيول شي او دارنګه په ځينو سیمو کې چې دا ستونزه موجوده وه هلته دې د رای اچونې موده تر یوه ساعته نوره هم وغځوي.
دارنګه په ځينو ښځينه محلونو کې د ټاپې نه موجودیت دی.
د جلال اباد ښآر د لومړۍ ناحيې امير شهيد بڼ حوزه کې ناضرین شکایت کوي چې رایه اچونه په دې محل کې کېږي خو د ټاپې لپاره ورقې د سراج المارت بڼ حوزې ته وړل کېږي.
د امنیت په برخه کې خلک له امنيتي تدابيرو او په پراخه کچه د ناضرینو موجودیت نه خوښ دي او په خبره يې خلک په ډاډه زړه د رای اچونې مرکزونو ته روان دي.
د ازادي راډیو خبریال همایون هېواد د کابل له کارتې نو څخه وايي، د کارته نو د رحمان مېنې د نجونو سايټ تر اوسه تړلى دى.
د هلمند چارواکي ډاډ ورکوي چې د رأی اچوونې د ټولو مرکزونو امنیت به خوندي وي.
د لښکرګاه اوسېدونکي د حکومت او د ټاکنو د کمېسیون نه غوښتنه کوي چې په ټاکنو کې د کېدونکو درغلیو عادلانه څېړنه دې وشي او هېڅ چاته باید اجازه ورنه کول شي چې د خلکو د رأیو سره خیانت وشي.
د ازادي راډیو خبریال محمد الیاس داعي د رأی اچوونې مرکزونو ته تللی دی چې راپور یې د لاندې لېنک په کېکاږلو سره اورېدلی شئ:
