د ترکیې ولسمشر د سوریې ولسمشر ته د ترورېست خطاب وکړ او د ترکیې صدراعظم سعودي عربستان ته تللی.
له دې داسې ښکاري چې د انقرې او ریاض اړیکې چې د "قطر-ایران" د دوستي پر سر خړپړې شوې وې، بېرته په رغېدو دي.
د ترکیې ولسمشر وویل چې د سوریې د سولې هڅې له ولسمشر بشار الاسد سره مخته نهشي تلی.
رجب طیب اردوغان بشار الاسد ته د ترورېست خطاب وکړ او ویېویل:
"د سوریې ولسمشر اسد په تأکید سره، اجازه راکړئ چې ښکاره ووایم، یو ترورېست دی چې د دولت په کچه ترورېزم مخ ته وړي. موږ دا نهشو ویلی چې دا کس خپل کار کولای شي. که موږ دغه خبره وکړو دا به له هغو نږدې یو میلیون سوریایانو سره انصاف نهوي چې ده وژلي."
د ترکیې ولسمشر دا خبره د چهارشنبې په ورځ «۱۳۹۶ کال د مرغومې ۰۶» په تونس کې د افریقا د څلور ورځني سفر په پای کې وکړه.
ده ټینګار وکړ چې د بشار الاسد په موجودیت کې د سوریې د سولې خبرې نهشي بریالي کېدای.
ښاغلی اردوغان زیاتوي:
"د سوریې په باره کې تر هر څه مخکې دا ناممکنه ده چې له اسد سره ادامه پیدا کړي، ځکه چې څرنګه کېدای شي چې موږ د سوریې داسې ولسمشر ومنو چې هغه د خپل هېواد نږدې یو میلیون کسان وژلي دي."
د سوریې په قضیه کې تر دې مخکې د انقرې او تهران اړیکې ښې شوې وې.
ایران د بشارالاسد کلک ملاتړی دی.
د انقرې او تهران اړیکې ښایي د اردوغان د نویو څرګندونو پر سر اغېزمنې شي.
بل لور ته د ترکیې صدراعظم بنعلی ییلدیریم په دوه ورځني سفر د ایران سیال هېواد سعودي عربستان ته تللی دی.
بنعلی ییلدیریم د چهارشنبې په ورځ «۱۳۹۶ کال د مرغومې ۰۶» د سعودي له پاچا سلمان بن عبدالعزیز سره وکتل.
د سعودي عربستان پاچا سلمان چې په ۲۰۱۵ میلادي کال کې واک خپل کړ، نو هڅهیې وکړه چې د ایران پر ضد د سُني هېوادونو یو ائتلاف رامنځته کړي.
بیا د روان کال په جون میاشت کې چې کله ریاض د دې لپاره له قطر سره اړیکې سړې کړې چې تهران ته نږدې شوی، ترکیه د قطر تر څنګ ودرېده، خو اوس داسې ښکاري چې انقره یو ځل بیا غواړي له سعودي عربستان سره چې د بشار الاسد له واکمني سره مخالفت کوي، نږدې اړیکې ولري.
