د امریکا ولسمشر ډونالد ټرمپ د سوریې په ادلیب ولایت کې هغه برید چې ویل کېږي په کیمیاوي وسلو شوی دی، بشریت ته توهین وباله.
په دې حمله کې چې د سې شنبې په سهار د خان شیخون سیمه کې الوتکو وکړ تر ۷۰ ډېر کسان ووژل شول او لسګونه نور ټپیان شول.
ډونالد ټرمپ تېره ورځ واشنګټن کې د اردن له پاچا سره ګډې خبري غونډې ته وویل، ادلیب ولایت کې شوې بمباري د زغم وړ نهده او د ده نظر یې د سوریې د ولسمشر بشارالاسد په اړه بدل کړی دی.
کله چې له ټرمپه پوښتنه وشوه چې دا پېښه به په سوریه کې د ده تګلاره بدله کړي، ده وویل چې تاسو به وګورئ.
د خان شیخون سیمه کې په بمباري کې اکثر تلفات ماشومانو او ښځو ته اوښتي دي.
د امریکا ولسمشر وویل:
"پر ماشومانو پروني برید پر ما ډېر اغېز کړی دی، خورا زیات. دا ډېره وحشیانه حمله وه، ډېره زیاته چې ما ولیده تر دې بدتره کېدای نهشي."
امریکا او نور غربي هېوادونه د بشار الاسد رژیم ملامتوي چې په خان شیخون کې یې د کیمیاوي وسلو حمله کړې ده، خو د سوریې حکومت او د هغې ملاتړې روسیې ویلي چې د جنګي الوتکو یوه فابریکهیې په نښه کړه چې هلته کیمیاوي وسلې ذخیره شوې وې.
د دې پېښې په ارتباط امریکا، بریتانیا او فرانسې امنیت شورا ته د یوه پرېکړهلیک مسوده وړاندې کړه خو پر دې مسودې د دې لپاره رأیي وانهخیستل شوې چې روسیې له دې سره مخالفت وکړ.
د روسیې د بهرنیو چارو وزارت ویاندې ماریا زاخارووا وویل چې دغه مسوده مسکو ته د منلو نهده او په بیړه چمتو شوې ده.
زاخارووا زیاته کړه چې دا مسوده د سوریې پر ضد ده چې ممکنه وه له هغې سره په سوریه کې شخړې نورې هم زیاتې شي.
د اروپایي شورا مشر ډونالد ټوسک ویلي دي چې د دغو جنایتونو اصلي مسؤل د سوریې رژیم دی او څوک چې د دې رژیم ملاتړ کوي هغه په دې جنایت کې داخلېږي.
