د افغانستان جمهوری ریاست وایي چې د مخابراتو او معلوماتي ټکنالوژۍ وزیر عبدالرزاق وحیدي دنده ځنډول شوې ده.
جمهوري ریاست وايي چې د مخابراتو او معلوماتي ټکنالوژۍ پر بېواکه شوي وزیر عبدالرزاق وحیدي د لګېدلو تورونو د سپیناوي لپاره یو پلاوی ګمارل شوی دی.
د ولسمشر مرستیال ویاند دواخان مینهپال د دوشنبې په ورځ ازادي راډیو ته وویل چې پر ښاغلي وحیدي د مالي فساد تورونه و، نو ځکه ولسمشر د هر اړخیزې پلټنې تر بشپړېدو پورې د هغه دنده ځڼدولې ده.
نوموړي زیاته کړه:
"د فساد د هغه مالي تورونو له امله چې د مخابراتو پر وزیر باندې لګېدلي، د مخابراتو د وزیر دنده ځنډول شوې ده، ولسمشر امر کړی چې پر نوموړي د مالي فساد د تورونو په برخه کې باید پلټنه وشي."
دا لومړی ځل دی چې د مالي او اداري فساد له امله د ملي وحدت حکومت د کابینې د یوه وزیر دنده ځنډول کېږي.
عبدالرزاق وحیدي تر دې وړاندې د افغانستان د ولسي جرګې لهخوا د پراختیايي بودجې د نهلګولو له امله سلب صلاحیت شوی دی.
د راپورونو له مخې د مخابراتو او معلوماتي تکنالوژۍ تخنیکي او مسلکي مرستیال انجنیر سید احمد شاه سادات د دغه وزارت د سرپرست وزير په توګه ټاکل شوی دی.
د ولسي جرګې د مخابراتو او مواصلاتو د کمېسیون ځیني غړي وايي، د شویو پلټنو له مخې په مخابراتو وزارت کې په مالي او اداري برخه کې فساد موجود و.
د دغه کمېسیون غړې نسیمه نیازۍ د ولسمشر له دې اقدام نه د هرکلي ترڅنګ وايي چې په فساد تورن ټول کسان که هغه په هر موقف کې وي، باید د څېړنو او په اړهیې د قانوني چلند لپاره، عدلي او قضايي ارګانونو ته معرفي شي.
نوموړې زیاته کړه:
"که چېرې په هغوی باندې لګېدلي تورنه ثابت شي، باید تورن کسان عدلي او قضايی ارګانونو ته واستول شي، څو اړوند ارګانونه له هغوی سره قانوني چلند وکړي."
اغلې نیازۍ زیاتوي د مخابراتي خدمتونو څخه د عوایدو د شفافو راټولولو په برخه کې شفافیت نهو موجود.
د افغانستان د مخابراتو او معلوماتي تکنالوژۍ وزارت وايي، په ۱۳۹۵ لمریز کال کې یې د مخابراتي خدمتونو له درکه څه باندې څلور میلیارده افغانۍ محصول راټول کړی دی.
راپور: رحمتالله افغان
