د امریکا ولسمشرۍ انتخاباتو کې د ډونالډ ټرمپ بریا نه یوازې د ډیموکراټ ګوند پلویان چې د هیلري کلېنټن په ګټه یې رایې ورکړي وې، حیران کړې بلکې د یو شمېر هېوادونو اندیښنې یې راپورته کړي دي.
رویټرز خبري اژانس د پاکستان د اندیښنو په اړه راپور ورکړی چې اسلاماباد د خپل پخواني سیال هند او امریکا ترمنځ د نېږدې والي له کبله اندیښنه لري.
د امریکا نوي منتخب ولسمشر ډونالډ ټرمپ په خپل انتخاباتي کمپاین کې څو ځلي د پاکستان یادونه کړې او انتقاد یې پرې کړی دی.
ټرمپ ویلي چې د پاکستان په څېر هېواد کې چې ثبات یې ډېر ډاډمن نه دی، د اټمي وسلې درلودل د اندیښنې وړ ده.
ټرمپ ویلي:
"له پاکستان سره ستونزه دا ده چې اټمي وسله لري او دا یوه اساسي ستونزه ده. دا یوازینی هېواد نهدی بلکه د هغو نهو هېوادونو په ډله کې دی چې اټمي وسله لري او نیمه باثباته دي او موږ نه غواړو چې دوی کاملاً بې ثباته شي."
ډونالډ ټرمپ دغه راز د روان میلادي کال په مې میاشت کې فاکس نیوز ته ویلي وو چې دی په افغانستان کې د شاوخوا لس زره امریکایي ځواکونو د ساتلو پلوي کوي، ځکه د افغانستان په ګاونډ کې پاکستان له اټمي سلاح سره پروت دی.
د رویټرز خبري اژانس په خبره واشنګټن او اسلاماباد هغه دوه تاریخي متحدین دي چې خپلمنځي اړیکې یې کله ترینګلي او کله سمې وي.
د راپور پر اساس دغه اړیکې هغه مهال په خرابېدو شوي چې په دې وروستیو کې د امریکا یوې بې پیلوټه الوتکې د پاکستان په خاوره کې د طالبانو د ډلې مشر ملا اختر منصور په نښه کړ.
رویټرز د ځینو پاکستاني کارپوهانو په حواله لیکي چې د ډونالډ ټرمپ اداره به د پاکستان پرتله له هندوستان سره نېږدې اړیکې ولري.
حسن عسکري رضوي له دغو کارپوهانو دی چې رویترز ته یې ویلي وو:
"امریکا به پاکستان منزوي نهکړي، خو ډونالډ ټرمپ به د هیلري کلېنټن په پرتله د پاکستان په وړاندې سخت دریځ ولري."
بلخوا افغانستان کې د پاکستان پخواني سفیر رستم شاه مهمند ازادي راډیو ته وویل چې له هندوستان سره د امریکا نېږدې اړیکې کولای شي د امریکا او پاکستان پر اړیکو منفي اغېز ولري.
ښاغلی مهمند وايي:
"پاکستان له چین سره نېږدې شوی او امریکا هندوستان ته. په هره اندازه چې د امریکا او هند اړیکې ښې شي هغومره به د اسلاماباد او واشنګټن ترمنځ بې باوري رامنځته شي. امریکا فکر کوي چې د چین لپاره هندوستان ته اړتیا لري او زما په نظر په راتلونکې کې هند ته د نېږدې کېدو لپاره د امریکا هڅې لا ډېرې شي او دا کولای شي د امریکا او پاکستان پر اړیکو منفي اغېز وکړي."
په همدې حال کې د پاکستان کراچۍ ښار کې د امریکا قونسل ګریس شلتون د پاکستان جیو نیوز ټلویزیوني شبکې ته ویلي چې د هېواد بهرنۍ پالیسي یې پر ملي ګټو ولاړه ده او زیاتوي چې د حکومت په بدلون سره به په پالیسۍ کې بدلون رانهشي.
سره له دې چې د امریکا نوي منتخب ولسمشر تر اوسه د جنوبي اسیا په اړه خپله دقیقه پالیسي نهده وړاندې کړې، خو په دې وروستیو کې یې د کشمیر پر سر د هند او پاکستان ترمنځ د شخړو د زیاتېدو په اړه ویلي وو چې د دغو دواړو سیالو هېوادونو تر منځ منځګړیتوب ته حاضر دی.
واشنګټن په پرلهپسې ډول پاکستان په قبایلي سیمو کې د یاغیانو په ملاتړ تورن کړی او د دغو وسلهوالو ډلو په وړاندې یې د اسلاماباد جدي اقدامات غوښتي، خو اسلاماباد هم په پرلهپسې ډول دا تورونه رد کړي دي.