سپینې ماڼۍ یو وار بیا ټینګار وکړ چې د پخواني ولسمشر جوبایډن د ادارې پر مهال امریکا ته د ټولو لیږدول شویو افغانانو بیا څېړنه کوي.
دا خبره د سپینې ماڼۍ ویاندې کارولین لیویټ په یوه خبري کنفرانس کې وکړه.
هغې وویل:
د ټرمپ اداره اوس په فعاله توګه د جو بایډن لخوا هیواد ته راوستل شوي ټول افغانان بیا څېړي. هر هغه څوک چې زموږ ملي امنیت یا زموږ اتباع ګواښي ایستل کېږي به.د سپینې ماڼۍ ویانده
میرمن لیویټ زیاته کړه: «ولسمشر ټرمپ دمخه د دریمې نړۍ هیوادونو څخه د بهرنیو اتباعو مهاجرت په دایمي ډول درولی دی چې د متحده ایالاتو لپاره خورا لوړ خطر رامینځته کوي.»
د سپینې ماڼۍ ویاندې کارولین همداراز څرګنده کړه چې د پخواني ولسمشر بایډن له خوا لږ تر لږه یو لک افغانان له هېڅ یا کم کنټرول سره امریکا ته راوړل شوي او اوس یې د امریکا امنیت ګواښي.
ولسمشر ټرمپ او اداره یې له افغانستانه د ۲۰۲۱ کال د اګست په وروستیو د امریکايي ځواکونو او د هغوی د افغان همکارانو د ایستلو په بڼې نیوکې لري.
د تخلیې د ماموریت پر مهال د اګست په ۲۶مه ماښام مهال کابل هوایي ډګر ته څېرمه په یوه ځانمرګي برید کې ۱۶۹ افغان ملکیان او ۱۳ امریکايي سرتیري ووژل شول.
د سپینې ماڼۍ ویاندې کارولین لیویټ وویل په واشنګټن ډي سي کې د ملي ګارډ په دوو سرتیرو مرګونی برید هم هماغه دښمن وکړ چې په کابل کې یې امریکايي سرتیري د تخلیې د ماموریت پر مهال ووژل.
تېره چهارشنبه د نومبر په ۲۶مه په واشنګتن ډي سي کې سپینې ماڼۍ ته نږدې افغان تبعه رحمن الله لکڼوال د امریکا د ملي ګارډ په دوو غړو سارا بکسټروم او انډرو وولف ډزې وکړې. سارا وروسته په روغتون کې ساه ورکړه او انډرو وولف لا هم بستري دی.
د تازه راپورونو په اساس انډرو وولف د دوشنبې په ورځ په روغتون کې د ډاکترانو د پوښتنو په ځواب کې خپلې ګوتې ته ټکان ورکړی دی.
د امریکا د کورني امنیت وزیرې کریسټي نوم ویلي افغان بریدګر ښايي په امریکا کې افراطیت ته مخه کړې وي.
رحمن الله لکڼوال د افغانستان د پخواني جمهوري نظام پر مهال د صفري قطعاتو غړی وو.
د ځینو امریکايي رسنیو د راپورونو په اساس رحمن الله چې امریکا کې د کار په لټه کې وو له ډېره وخته له رواني پلوه ښه نه وو.
دا ۲۹ کلن افغان تبعه چې د امریکا د ملي ګارډ په سرتیرو د برید پر مهال د نورو امریکايی ځواکونو له خوا هدف وګرځېد په خپله هم ټپي او بستر دی.
دی د لومړي درجې قتل له تور سره مخ دی. سپینه ماڼۍ د هغه لپاره د تر ټولو سختې سزا غوښتنه کړې.
لکڼوال که څه هم د برید پر مهال یواځې وو خو دې پېښې امریکا کې افغان کډوال او امریکا ته د تګ په تمه ټول ناست افغانان اغېزمن کړي. د راپورونو له مخې د لسګونو زرو هغو افغانانو برخلیک له خطر سره مخ دی چې په امریکا کې د دایمي اقامت او نورو اسنادو په تمه پاتې دي.
همدارنګه لسګونه زره نور کسان په پاکستان او ځینو نورو هېوادونو کې امریکا ته د تګ په تمه په سخت وضعیت کې دي.
د افغانانو د انتقال د یوې مدافع ټولنې افغان ایواک مشر شان وان ډایور او د افغانستان د بشري حقونو لپاره د ملګرو ملتونو ځانګړي راپور ورکوونکي ریچارډ بنیټ ټینګار کړی چې د یوه شخص د کړنو لپاره باید ټوله افغان ټولنه مجازات نه شي.
